ازاي تطلع فيزا جورجيا الإلكترونية بدون رفض

Published on March 31, 2017

كتبها: أمير شاهين

فيزا جورجيا الالكترونية سهلة جدا ولا يشترط فيها حساب بنكي ولا ورق ولا حجز طيران وإقامة ولا كل الكلام ده. سهل جدا انك تحصل على فيزا جورجيا بدون رفض لو اتبعت الشرح اللي جاي.

*ملحوظة

الفيزا ديه الكترونية، يعني بتوصل عن طريق البريد الالكترونى بتاعك بتطبعها وبتاخد باسبورك وتتوكل على الله لجورجيا بس مش بتثبت على الباسبور. لوحبيت تثبتها على الباسبور بتاعك بتاخدها من السفارة بتاعتهم من القاهرة هنا وليها شروطها الطبيعية زي الحساب البنكي وباقي الاوراق وحجز مبدئي وكدة بس اعتقد انها بتطلع بسهولة برضوا.

قبل ما ندخل على الشرح هنشوف سريعاً (جورجيا في كبسولة)

- عاصمة جورجيا هي مدينة تبليسي

-عدد السكان 3.3 مليون نسمة تقريبا

- اللغة الرسمية هي اللغة الجورجية

- موقعها الجغرافي : بين شرق اوروبا و غرب آسيا على امتداد سلسلة جبال القوقاز جورجيا بتشترك في الحدود من الشمال مع روسيا ومن الجنوب مع أرمينيا وتركيا واذربيجان، ومن الغرب بتطل على البحر الاسود وتتميز بطبيعتها الساحرة.

معمارها التراثي قديم  وهي عضو في المجلس الاوروبي والامم المتحدة وحاليا بيستعدوا للانضمام للاتحاد الأوروبي "يارب ما تبقى اتحاد اوربي :)"

- العملة الرسمية الاري .. والدولار = ٢.٣ لاري تقريباً

- اشهر المناطق السياحية غير العاصمة Kazbegi, Kakheti, Uplistsikhe, Davit Gareja, Batumi, Mtskheta, Svaneti Mestia او استخدم طبعا موقع http://www.tripadvisor.com/

علشان تشوف معلومات عن المناطق دي او مناطق اخري وحالة الطقس وكدة

- أشهر الأطعمة الجورجية :  Khinkali ، Khachapuri ، Chanakhi ، Churchkhela

- اسعار الوجبات من ٢ ل ٨ لارى حسب المطعم والحجم .. ده غير طبعا سلاسل المطاعم الشهيرة زي ماك وكنتاكي وكدة وممكن تدور علي مطاعم حلال عن طريق موقع وتطبيق Zabiha.

- الاتصالات والإنترنت: اشهر شبكة هناك اسمها magticom سعر الخط ب ٥ لاري . شحن باقة الإنترنت ٤ جيجا ب ١٠ لاري ورصيد مكالمات ابتداء من ٥ لاري ومكاتبهم منتشرة في كل مكان.

- الطيران المباشر من مصر: شركة وحيدة بتطير كل اسبوع تقريبا لتبليسي جورجيا طيران مباشر من الغردقة اسمها اير كايرو والتذكرة ب ٢٥٠٠ جنية ذهاب وعودة.

اخيراً،  بالنسبة للاكل والشرب والفسح والاقامة والانتقالات . ممكن تراجعوا مقالي السابق عن تحضير سفريتك من الالف للياء باقل التكاليف.

شرح الحصول على الفيزا الالكترونية:

متطلبتها كالاتي: صورة جواز السفر الصفحة الأولى ومعمولة scan نظيف عالي الجودة عن طريق سكانر - باسبور صالح ٦ شهور على الاقل - صورة شخصية خلفية بيضاء حديثة ومختلفة عن صورة الباسبور وتعملها سكان برضوا بجودة عالية عن طريق سكانر ولو عاوز تعرف شروط الصورة ادخل على اللينك ده
 

خطوات التقديم كالتالي:

1- هتدخل على الموقع ده: https://www.evisa.gov.ge/GeoVisa

2- اضغط apply now

3-الخانة الاولى الجنسية

4-الخانة الثانية نوع الفيزا: Ordinary

5- الخانة الثالثة تاريخ انتهاء الباسبور

6- الخانة الرابعة الغرض من الزيارة (سياحة طبعا)

بعد كدة فية 3 خانات تانين سيبهم فاضيين خالص

7-رمز التأكيد Security verification

8- هيجيلك صفحة تانية بعد كدة  هتحط فيها تاريخ الوصول لجورجيا وده بيبقى بداية سريان الفيزا تبقى صالحة ١٢٠ يوم وتقدر تقعد بيها ٣٠ يوم

9- بعد كدة هيجيلك صفحة كمان فيها الشروط باللغة الانجليزية اقرأها وعلم عليها

10- بعدها صفحة كمان دي مهمة جدا هتكتب فيها الاسم مطابق تماما للباسبور، ومتغلطش في حرف واحد البيانات كلها لازم تبقى سليمة.
"ملحوظة هامة: ال surname ده هو الأسم الأخير في الباسبور سواء رابع أو خامس"

وبعد كدة هتدخل البريد الالكتروني بتاعك اللي هتوصلك عليه الفيزا، وهترفع الصورة للموقع

11- خانة Check the box if application is submitted by representative متعلمش عليها سيبها فاضية

12- خانة  Travelling With Companion دي لو انتو عائله و مسافرين مع بعض فبتعلم على الخانه دي وتكتب اسماء الناس اللي مسافرة معاك، لو مسافر لوحدك متعلمش عليها

13- هترفع صورة الباسبور

14- هيجيلك صفحة كمان ودي الاخيرة، هتراجع على كل بياناتك وتتاكد انها صح ومفيش حرف واحد غلط حتى علشان ميجلكش رفض وتضغط VERIFY

15- اخيرا هيوصلك ايميل على بريدك الالكتروني اللي حطيته قبل كدة فيه تأكيد وبعدين هيجيلك صفحة دفع. دي هتدفع فيها ثمن الفيزا اللي هو ٢٠ دولار بس.

كدة خلصت كل الخطوات. في خلال اسبوع هيوصلك على بريدك الالكتروني الفيزا، هتطبعها وتسافر على طول :)

ولو اترفضت الفيزا هتبقى انت السبب لان دي فيزا الكترونية يعني مافيهاش رفض المفروض وهتبقى غلط يا اما في مواصفات الصورة الشخصية او ان الاسكان بتاع الصور بجودة ضعيفة او انك وانت بتكتب بيناتك كتبت حرف غلط مثلا.

*تم نشر المقالة أول مرة على مشروع سفر